鳥與貓鬥

泰國遊 - 最後晚餐

2006-10-13T02:07:00.000+08:00

非常不幸，黎到曼谷第二晚都係落大雨，仲不停行雷閃電，雷聲大到有ｄ得人驚，最後一夜都冇得行夜市，為左補償番，決定豪一豪佢，返酒店食Buffet。其實我地之前個晚已經去八左一八，就係Shuttle Boat碼頭個間Riverside Terrace，回房沖完涼就去大擦一餐！(Marriott BBQ Buffet 每位1200Baht)

呢度最特別係佢全部用開放式廚房，不同食品的位置都有一個廚房在中間，大廚即時炮製食品放在盤上，最受歡迎的BBQ廚房就不停燒海鮮、扒類等食品，我當然唔執輸要了兩隻老虎蝦，當然鮮甜美味到不得了。另外，仲有蒙古鐵板燒，意大利、中國、日本、泰國、馬來西亞的廚房，未全部試晒都已經好飽，如果要黎試的請預早留肚。

Buffet六點至十點半，可以慢慢食，仲有泰國舞表演添！

逼留了三天曼谷，其實去過的觀光點不多，主要是購物和食食食，美味的食品隨街都有，只係為了肚子的安全起見，街邊小食都係小試為妙，而新建的商場雖然又大又靚，但我對入面的名牌店舖興趣不大，都係直行直過。

最後一日行到四面佛附近，突然有個懂英文的泰國人問我地想去邊(因為我地睇緊地圖)，又話佢自己係小學老師，今日係公眾假期，叫我地去附近一間寺廟參拜一年一度的Lucky Day．．．愈講愈唔對路，頭先好似見到一大班著住校服的學生經過，點會係假期？於是問佢去四面佛應該點行，佢即時變黑面指左個方向就走，好彩我地兩個都唔Lu Lu，唔係去左就真係Lucky Day。

四面佛真係好多香港人拜，周圍都係講廣東話的師奶，就係因為呢ｄ師奶走去同軍人影相，我先膽粗粗敢同ｄ軍人講影合照，多謝你呀，可愛的師奶們，終於完成左我呢次去泰國的任務了！

ZEN商場面積大又靚，可惜唔o岩我呢ｄ鍾意cheap野的人

Siam Paragon有個好大的Food Court

Siam Paragon大到法拉利都有得賣

就係同呢三位站在四面佛門外的軍人影左合照^0^

泰國真係買Boots的天堂，呢度保守估計慳左HK$500以上

泰國遊 - 沒坦克的皇宮

2006-10-08T00:00:00.000+08:00

前幾日先見電視新聞話大皇宮有軍人及坦克車嚴陣戒備，一心諗住黎睇坦克車，去到門口除左見到有幾個軍人守衛(相信平日都有)之外，坦克或軍車都唔見有一架，有ｄ失望！

入大皇宮有Dress Code，唔係要打呔著裙，係唔理男女老幼都唔可以著背心、雞冀袖、短或三或四個骨褲，反而著及膝裙又OK，奇怪！如果你真係著成咁去到都唔駛愁，大皇宮門口有地方借衣服俾你換，只要俾低按金，回來交回衣服就可以取回了。(大皇后及玉佛寺入場費250Baht)

好似冇事發生一樣，仍然好多遊客參觀

牆壁同神像都係用金色為主，唔知係咪真金呢？

好多室內地方都要除鞋及嚴禁拍照

金呀！好想刮你回家

修剪得好有趣的樹木

呢個好似係泰國國徽

點解朝早咁好天，晚上都會落狗屎呀

泰國遊 - 泰版葵涌廣場

2006-10-07T00:00:00.000+08:00

BTS空鐵，即是架空的鐵路，唔想塞車就最好搭佢。好多個BTS站一出就係大型商場，例如MBK、Siam Paragon、Siam Center、Central World Plaza、Big C等等，咁多個商場我最喜愛就係MBK，因為價錢經濟，又多野食選擇，行半日都未夠，BTS的National Stadium站一出就係啦。

MBK商場裡好多野食，有吳君如推介的多士Mont Nom Sod，試過都OK，但入面唔俾影相，冇得同大家分享，多士細細件可以當甜品，一件買40Baht，在泰國算貴了，但仍然人頭湧湧；反而胡慧沖推介的Rotiboy墨西哥包，真係好好味，我地總共食了三次，外面鬆化裡面軟綿綿，只售25Baht，但似乎熱潮退了，店裡小貓三四隻。之後再接再厲，又試了七樓泰式車仔麵映豆腐，味道都OK，唔得個肚開始想爆，要係商場散o下步先。

晚上本來想行去Mango Tree食泰菜，但係外面突然狂風雷暴，雨落到好似倒水一樣唔停，於是決定放棄，由於仲未肚餓，在商場樓下的臨時檔口買了粉卷和薄脆回酒店當晚餐，老實講，真係未食過咁好味的粉卷，粉皮滑滑，入面的菜清甜，個汁甜甜酸酸，佢仲俾左好多香葉我包住食，味道有ｄ似冬蔭公，好正好正。

好多遊客同上班族都會搭BTS

非上下班時間人少少好舒服，廣告配合車門設計好型

MBK商場好似加大版的葵涌廣場

泰國Pizza Hut的新口味Pizza，食條邊都飽啦

售75Baht的泰式車仔麵，見到碟底的油就知佢辣，後面的是椰汁糕

30Baht一盒的粉卷，好味到震；加大版的薄脆10Baht一個，淋左都俾我食晒

泰國遊 - 芭堤雅例牌活動

2006-10-06T02:17:00.000+08:00

對唔住，我又跳番去講芭堤雅，去到芭堤雅冇的士，要搭兩排車，每次都要同司機講價，總之一埋身先殺一半價，冇死！不過越夜就越難殺，因為芭堤雅夜晚真係好鬼旺，酒吧開到成街都係，自然多人搭車。

芭堤雅有兩大購物中心，Central Festival Centre同Royal Garden Plaza，當然唔會錯過，貨品和曼谷差不多，可以留待曼谷才買，而且自己和朋友都冇乜購物癮，都係行過就算。

黃昏去左之前在網上預訂了的Let's Relax按摩，試完實在要極力推廌，裝修佈置又靚又乾淨，職員友善又好笑容，按摩時不會談話，我試了兩小時的Thai Herbal Massage，草藥的味道加上按犘師的手勢，正正正！雖然和深圳的價錢差不多，但環境和服務就差好遠，所以第二晚忍唔住又上門按多次。(Thai Herbal Massage兩小時700Baht)

晚上諗住去胡慧沖和晶晶都有介紹的頌塞餐廳Somsaksi's Restaurant，找了一段時間都找不到，個個路牌又係虫虫文字，問了幾個泰國人都雞同鴨講，於是試下問鬼佬會唔會識路，點知原來鬼佬們先至係地頭蟲，個個都好清楚咁話俾我地聽應該點行，多謝晒呀！

幾有特色的兩排車，不過冇空調

Big C就係Central Festival Centre個度，同司機講去Big C就得

Let's Relax的獨立房間乾淨整潔

按摩中打開床頭的百頁簾，望住窗外的噴水池，真係好正呀

Somsaksi's Restaurant佈置得幾特別，可能政變關係，少了好多食客

本來隻雞著緊火，但影得太遲餘番ｄ煙，碗冬蔭公唔似香港個ｄ紅噹噹

去到當然要食只售300Baht的海鮮拼盤，魚同蟹都幾鮮甜，貝類就淡左ｄ

泰國遊 - 窩心的酒店

2006-10-03T02:22:00.000+08:00

係曼谷湄南河畔的Marriott Resort & Spa雖然唔係在購物區中，但酒店有免費船隻每十五分鐘一班往來BTS的Saphan Taksin站，完全唔駛擔心會塞車，又可以免費遊覽湄南河，一舉兩得。

當你行到好熱，坐船回酒店時，船上滿臉笑容的酒店職員唔理你係咪酒店住客，都會即時遞上冰凍毛巾及冰凍蒸溜水一支，非常體貼；每天早上，門外都會掛著一份即日報紙；仲有當我八八卦卦走去睇佢地穿花環時，女職員又即時送我一朵鮮花，而且完全沒有想討貼士的舉動，好多雞毛小事都會令你覺得份外窩心，呢一間相信係我近年最滿意的一間酒店。(房間日租HK$650+120河景)

Lobby又大又靚

早餐及晚上Buffet都可以選擇坐在室外，望住河景慢慢嘆

泳池好似係森林入面一樣

我住個間有露台、河景、仲好闊落

可以坐在露台前嘆下報紙先

由酒店碼頭出發到BTS站，船程約十五分鐘

由這站坐十分鐘左右，好快就到大型商場林立的Siam站

泰國遊 - 完全relax的海灘

2006-10-02T00:04:00.000+08:00

在Beach Road上，Hard Rock Hotel附近的Nova Tour join左去珊瑚島Hard Tien海灘的一天遊，包快艇來回、午餐及酒店接送，九時出發四時回程。 (每人650Baht)

天有點陰，好似想落雨，由芭堤雅坐快艇約二十分鐘就到Hard Tien (中文好似叫星月島)，好耐未見過咁靚的海灘，水好清沙勁幼，落水行好遠都未沒頂，好正！呢度有水上電單車同香蕉船出租，其他水上活動就有專船送你去玩，都好方便。

我和朋友以前都有玩過，加上現在老骨頭，所以今次都係齋遊水同曬O下太陽，Hea係度小睡片刻真係好relax。Hea左半日，發現原來成個灘都係得我地兩個Chinese，連講英文的鬼佬也少，多數都係歐洲人，講乜都唔怕俾人聽到，哈！

哇，下船啦！

哇，ｄ沙好幼呀！

海水好清，游完唔會成身痕

呢度就係供應午餐、廁所、更衣室、Locker等等的地方

沙灘椅日租100Baht，都幾舒服，曬太陽一流

水裡面有ｄ好得意的生物，o者喱狀，游游下會貼住一排幾隻，乜來？

島上的狗都係呢個品種，可能係一家人

泰國遊 - 年青人的酒店

2006-10-01T12:29:00.000+08:00

前一晚打o左長途電話俾炳嫂 (最好在晚上才打電話俾炳嫂，中午時份電話多數飛左去Fax機)，book了由機場去芭堤雅的車 (1300Baht包高速買路錢)，大約兩個半小時到達芭堤雅Hard Rock酒店。

Hard Rock Hotel裡面的服務員全部都是二十多歲的年青人，個個滿臉笑容，酒店仲送我地一個Welcome Drink同Lunch添，雖然個Lunch味道麻麻^0^。酒店內的佈置全部都同音樂有關，周圍都見到Beatle、Elvis等等巨星畫像，今次我間房入面係Michael Jackson的大頭相，哈哈！好彩唔係"已故"巨星。(房租HK$650一晚)

位於芭堤雅的Hard Rock Hotel

酒店lobby有好多關於音樂的佈置

連餐廳的調味樽都係和音樂有關

泳池有人造沙灘

晚上的酒店更有特色

泰國遊 - 新機場第一天運作

2006-09-30T21:35:00.000+08:00

在意想不到的情況下，回程竟然是新機場運作的第一天，已經有心理預備會塞車呀，delay呀，排隊呀。可能唔係繁忙時間，冇塞車直上Highway，大約一個小時多ｄ就見到機場，個機場好大，由望見到落車足足要二十分鐘有多，沿途好多泰國人在機場跑道附近的馬路邊欣賞飛機升降，的士伯伯都未黎過，一路駛一路話so big。(泰航來回機票特價HK$1180，的士市區往新機場500+60Baht買路錢)

第一日除左有真係搭機和接機的人之外，仲有電視台同睇熱鬧的人，到處人山人海，好多指示牌都不足，唔睇地圖都會迷路。(泰國出境機場稅每人500Baht) 唔講咁多，大家睇相啦！

電視台由27號晚開始直播新機場情況至28號下午六點鐘

Suvarnabhumi Airport有d似香港機場，但燈光就比較暗

電視台的工作人員通宵拍攝，個個都累透了

接機位好似窄左ｄ，要在人海中搵名牌

禁區內的泰式佈置美輪美奐，很有特色

檢查行李閘口外垃圾筒不足，個個爆滿，大家只好放在木板上

燈光昏暗，空調不足，加上航機delay左個半鐘，大家都想睡了

**哈哈，對唔住冇跟次序講，大家自已調校o下啦，下次你估講乜呢，呵！

我回來了

2006-09-29T03:24:00.000+08:00

唔知好彩定唔好彩，俾晒錢先遇到政變，唔係可能去唔成；
唔知好彩定唔好彩，一個行程用晒兩個機場，見識到佢新舊交替，仲有delay左個半鐘；
唔知好彩定唔好彩，曼谷兩晚都狂風雷暴，冇得行夜市，試左最平同最貴的一餐；
唔知好彩定唔好彩，諗住去大皇宮見坦克車，去到只係見到人山人海的遊客，同小貓三四隻的軍人；
唔知好彩定唔好彩，買唔到平Wacol，但係買到超抵的Boots；
唔知好彩定唔好彩，試到超正的按摩店，相信從此去到必會瘋狂按按按；
唔知好彩定唔好彩，泰國除左遇到一個街邊神棍之外，其他人都好好笑容同非常友善；
唔知好彩定唔好彩，返到黎香港好"支力"，o訓完再繼續寫吧！

3.5級地震

2006-09-15T13:16:00.000+08:00

尋晚在公司食完飯，正在坐定定做野個陣，突然感覺到兩下微震，眾同事議論紛紛，「地震？」、「係唔係大車經過呀？」、「樓下搬版紙呀？」、「好似有兩下喎？」．．．

第一次感覺到地震，睇報紙話有3.5級，原來3.5級都好輕微，好似打左個尿震咁，但係香港有地震，聽落都幾得人驚，要知密密麻麻的高樓大廈，通通冇做防震措施，如果遇到大一ｄ的地震，不敢想像。全球天氣繼續反常，香港唔係位處於地震帶，今次都發生3.5級地震，睇黎地球先生的病越來越嚴重了！

Failure to launch

2006-09-14T02:16:00.000+08:00

雖然《色慾都市》裡面我唔係最喜歡女主角Sarah Jessica Parker，但係見到佢做電影都有ｄ興趣想睇o下，Sarah今次唔做作家，做一個愛情顧問，專幫失意男人重拾自信，獨立生活。而男主角就係演慣呢類愛情小品電影的Matthew McConaughey，記得《戀上你新郎》和《十天戀愛有限期》嗎？佢起碼都高大威猛，靚仔有型。

《踢走住家男 Failure to launch》好似唔覺香港有上映，套戲講男主角女友如車輪轉，每次帶女友回家發現佢和父母同住就會分手，久而久之每次想飛女友便會帶回家，佢父母為左想個仔搬出家門過獨立生活，於是聘請愛情顧問幫手．．．

佢同《戀愛嫁期》一樣，故仔好多野都到喉唔到肺，草草了事，冇感動人的情節，Sarah睇上黎仲有ｄ老；反而配角電腦呆小子和神經質的女友呢一pair又幾得意，佢地幫小鳥急救個段真係幾好笑！睇黎Sarah要進攻電影圈，首先要搵ｄ好劇本了。

Matthew McConaughey 和 Sarah Jessica Parker

英劇 - Doctor Who

2006-09-08T13:18:00.000+08:00

亞視國際台播緊第二輯的《Doctor Who 異世奇人》，係我喜愛的科幻+外星的片種。原來呢套英國的電視劇已經歷史悠久，好似007咁，現在第二輯的Doctor已經係第十代，呢輯我未睇，講番第一輯先，即是第九代Doctor。

飾演第九代的演員Christopher Eccleston，睇樣年紀大約四十幾歲，劇裡面講佢已經900歲，擁有神奇力量、可以縱橫時空、穿梭宇宙、主宰時間的外星人，佢的同胞為左宇宙和平而全部戰死，於是Doctor獨自一個人穿梭時空旅行，途中遇到地球人Rose，之後結伴一齊冒險旅行。

呢套雖然係電視劇，但係特技同化裝都非常認真，可能係為左連貫以前的風格，很多道具以及場景都刻意做得有懷舊的味道，好似Doctor的時光機（同時都係宇宙船），個樣就係舊時老老套套的電話亭（雖然佢寫係Police Box，但我都覺得似電話亭多ｄ）。還有好欣賞佢每個故仔裡面都有ｄ意思，唔係單單一套空洞的科幻劇集，而Christopher雖然唔靚仔，但演技出眾，演活左智勇雙全的Doctor，可惜Christopher沒有繼續演第二輯，第十代的David Tennant比較年輕，唔知又會演成點？

左起Rose, Doctor（第九代）, Jack

電車男

2006-09-06T03:42:00.000+08:00

聽講《電車男》的故事係由真人真事改篇，最初睇係伊東美崎版的日劇，樣子笨笨又唔靚仔的電車男點樣奇蹟地受到愛瑪仕睞青，冇完整咁睇晒全套劇，但感覺都幾搞笑。

前排睇完佢簡体版的小說，同電視劇好唔同，可能為左要拍十幾集，加左好多支線同人物，但其實小說全本都只係即時留言版上的發言，並冇提及其他事件或者人物，就好似坐係電腦前睇留言版一樣，而最有趣係，各網友用符號去拼出有趣的圖畫來表達自己的心情，令人會心微笑。

日劇同小說都搞掂左，當然唔會放過電影版，戲裡面電車男同愛瑪仕的「距離」冇電視劇咁遠，感覺比較忠於小說，但娛樂性就麻麻地了。另外，無意中發現原來出完字幕之後，有一小段情節俾電影故事延續落電視劇的，電車男救電車男，你有冇miss左呢？

甲賀忍法帖

2006-08-30T02:47:00.000+08:00

又一套漫畫真人化，《甲賀忍法帖》其實係改篇自一本50年前的小說，故事有ｄ似羅密歐與朱麗葉，同樣係兩個敵對家族頭目孫兒的戀人，為了德川家族的命令，進行兩派十對十的殺戮戰，直至最後一人生還為止。

套漫畫好耐之前睇過，不太喜歡，印象中只記得不停咁殺殺殺，氣氛好灰。電影的感覺就好唔同，風光如畫，鏡頭拍攝得女主角仲間由紀惠好靚；而故事就變動好大，可能係時間關係，十對十的決戰變成五對五，好多暗殺場面都簡化了，結局亦唔同晒，睇睇下都有ｄ悶悶地。

另外，呢套的動畫版（全24話）會係2006年9月23日起逢星期六晚上12:15於翡翠台播出，唔知會唔會跟足漫畫呢？

甲賀弦之介和伊賀朧

倉鼠發電機

2006-08-27T12:00:00.000+08:00

小倉鼠每天除了睡覺、挖地、就是跑跑跑，如果滾筒可以駁落發電機就好了。

倉鼠也放假

2006-08-26T01:34:00.000+08:00

家姐一家去了韓國五天遊，家中的倉鼠暫時寄居在我家。放暑假期間，本來白天睡覺的小倉鼠不斷受到我家姐個仔搔擾，日日冇覺好O訓，在我家呢五日，佢終於可以好好咁休息一下。

倉鼠真係好鐘意跑步

夏日炎炎睇冰燈

2006-08-25T19:47:00.000+08:00

初初諗住入去一陣間都唔會有幾凍，但影左冇兩張相隻手已經凍冰冰，但兩隻小魔怪係咁話唔凍唔凍，周圍走去掂ｄ冰，又話ｄ冰唔凍係假野．．．個場好細，十五分鐘都行完，二十蚊入場當做善事，唔諗住去哈爾濱走黎呢度感受下都OK啦；另外，俾個貼士你，如果唔想排咁耐隊，最好在食飯時間去，一點左右，否則兩點後起碼要排半小時呀！

太古城中心哈爾濱冰燈節
日期﹕7月13日至9月17日
時間﹕上午10:00至晚上10:00
地點﹕太古城中心2樓中橋
入場費﹕$20，不設找贖（將全數撥捐香港世界宣明會）
查詢﹕2568 8665

冰雕展入場注意事項
1) 必須穿著長褲，不可著涼鞋
2) 大會免費供應大褸

未完的故事(二)

2006-08-20T00:20:00.000+08:00

**內容有提及故事情節，未睇勿看！

第二套同樣係有下集的《加勒比海盜：決戰魔盜王》，呢集ｄ特技真係可以話正正正，鬼船上的船員，雖然核核突突，但真係正到不得了，仲有好似八爪魚的鬼船長，竟然仲可以有表情，哇！正正正！

今集有好多爆笑的情節，最深刻就係在食人族裡，眾船員在山崖上合力搖動籠子，配合優美的音樂，真係笑到肚痛。但老實講，我還是比較喜歡上一集多ｄ，今集太多刻意經營的笑位，尤其不喜歡近尾在島上風車打鬥的一段，而今次奧蘭度布林（Orlando Bloom）和姬拉麗莉（Keira Knightley）似乎都俾出色的配角搶晒戲。

近年電影的通病都是著眼特技CG，往往唔記得故事的重要性，其實呢套電影仲有好多的發展空間，例如：積克怎樣成為海盜、鬼船長的一段情、海盜船黑珍珠的歷史等等，如果將多餘的笑位減少，留多一點時間俾套戲講故仔，呢套電影會完美得多！

另外，傳聞結尾出字幕後會有第三集的trailer睇，於是賴死等左差不多十分鐘，終於．．．記得戲裡面俾食人族追的狗狗嗎？佢坐在之前尊尼特普（Johnny Depp）坐過的神座上，咬住一舊骨頭，相信佢係等緊俾人燒熟黎食，呢段大約有5秒左右，trailer就冇了，唔知係佢cut左，定傳聞係流料呢？

鬼船長

未完的故事(一)

2006-08-20T00:05:00.000+08:00

**內容有提及故事情節，未睇勿看！

剛剛睇完兩套電影，兩套不約而同都係未完的故事，要遲ｄ買多張飛入戲院睇下集大結局。

先講由漫畫改篇的《死亡筆記》，之前講過憂慮夜神月角色會做得不好，睇完之後，其實藤原龍也都做得不錯，只係角色實在難演，夜神月不似L一樣，L有古怪的外型行為可以表達，所以只要樣子氣質配合，就不難俾觀眾認同，所以由松山研一飾演的L，一出場未做戲我己經叫好。

電影特別加了一個漫畫裡沒有的重要人物，夜神月的女友詩織，相信係為左簡化漫畫本身複雜的情節，而呢個改動都有不錯的效果，只係覺得做女友角色的演員木口木面，佢地兩個完全冇情侶的感覺，所以佢死個幕完全感動唔到我，如果呢段做得好ｄ，相信套戲會好好多。

好記得漫畫時，FBI的未婚妻差不多要查出奇拿係邊個，而夜神月又因為唔知佢個真名而殺唔到佢，非常緊張，電影裡呢段似乎失色好多。而用流克做的CG真的麻麻地，相信用真人化裝去做更好，期待下集故事情節會做得更加緊張，另外，特別喜歡結尾L食緊"原味薯片"挑戰夜神月的一幕，好正！

飾演L的松山研一

新華書城

2006-08-19T16:15:00.000+08:00

記得上次放假去開銅鑼灣，諗住順道逛逛禮頓道的新華書城，因為之前未去過，又唔知係街頭定街尾，於是便由泉章居一直行，行完整條禮頓道先到書城，又晒又熱，身水身汗，去到書城門口，有張A4 size咁上下的通告：今、明兩日進行年度內部裝修，休息兩天。一年得個兩日裝修都俾我撞中，六合彩又唔見我中。>"<.....＃％＠＆ｘｙｚ！

今次醒目地由鵝頸橋行過去，好快就到了，新華書城應該係香港最大的簡体字書店，樓高四層，價錢沒有提高（其他簡体書店都比原價高），只是用港幣1：1俾錢。可能行過深圳的書城，覺得呢度冇想像中咁大，不竟香港要有好似中央圖書館咁o既規模的書店真係天方夜譚，但已經比其他書店大，但似乎關於歷史哲學和食譜的書比較多，小說的比例就少左ｄ。今次只買了兩本小說，下次有機會再去慢慢睇先。

漫畫真人化

2006-08-12T20:28:00.000+08:00

唔知係咪出色的編劇少了，真係好多漫畫改篇拍成電視劇或電影，漫畫裡面可以天花龍鳳，特技爆破完全唔駛擔心成本技術，真人演譯當然就困難多多。

《死亡筆記》可以話係近年來最有「智慧」的漫畫，男主角夜神月同L鬥智鬥力，生死一線，睇到非常肉緊。仲有裡面文字之多，少ｄ眼力耐性都唔得，絕對係俾成年人睇的漫畫，所以改篇呢套漫畫完全在預料之中，死神流克係而家的CG技術黎講亦唔算難，最難在要找英俊、亦正亦邪、眼神充滿智慧的年輕演員，去演譯一個咁複雜的天才高中生。

無論如何，《死亡筆記》電影終於上畫了，看了劇照及Trailer，似乎我的擔憂相當正確，相反L的角色好像有意外驚喜，講到呢度，都係等我下星期入戲院睇完再講。

另一部在日本好受歡迎的漫畫《NANA》，雖然講述搖滾歌手娜娜和少女奈奈兩位女主角的感情故事，但大家的焦點似乎都在娜娜身上，所以電影裡面飾演娜娜的中島美嘉，想唔紅都難。

改篇漫畫另一個難處就係有時裡面人物，個個俊男美女，要幾型有幾型，真實世界裡面你去邊度搵咁多外型咁正的演員呢？單是看看電影《NANA》裡面的蓮和泰士，我的失望真係跌到谷底，所以到呢一刻我仍然未有勇氣去睇呢套電影。

《我和她的XXX》係一部非常爆笑的漫畫，男人婆女主角和溫柔善良的男主角互換了身體，意外出奇地令到兩人成為眾人的女神及白馬王子…… 裡面最搞笑當然係森永愛的拿手戲”基的疑惑”，當年《貧窮貴公子》真係笑到肚痛，好期待真人演譯可唔可以一樣有咁爆笑的效果，而呢部漫畫只係出了兩集就已經拍成電視劇，好懷疑往後的故事都係電視台自己創作，水準可能會有所影響。

講左咁耐，其實上述三套我都未睇過，唔可以評論佢地究竟成唔成功。但出色的漫畫多的是，電影公司唔知幾時又會拍以下幾部，相信都有ｄ難度：
《Monster》鬼佬多過人，環遊歐洲多國；
《Skip Beat》超多內心劇，女主角要非常演得及搞笑；
《結界師》特技做到傻；
《柯南》要搵一個有成人精明眼神的細路。

搵命博！

2006-08-11T13:38:00.000+08:00

有時戶外採訪即時新聞的記者都幾難做，好似颱風逼近，要走出戶外感受風力強弱，等坐係電視機前面的觀眾抖抖腳睇下。好似尋日雖然打一號風球，但阿"寶霞”似乎只係在香港下面悄悄走過，相反另一個颱風”桑美”在浙江福建一帶登陸，風力強勁得多。當我又抖抖腳睇記者感受風力時，對不起，我笑了>"<

阿修羅城之瞳

2006-08-11T03:24:00.000+08:00

諗起好耐之前，其中一集《Bistro Smap》裡面請左宮澤里惠和市川染五郎上去做嘉賓，當期時正是佢地個部電影《阿修羅城之瞳》上映的時候，睇見那張電影poster（左圖）已經想睇，但香港戲院唔上，DVD亦難找，到今時今日終於俾我睇到了。

聽聞呢套電影係由著名舞台劇改編而成，女主角宮澤里惠唔駛講大家都識，但估唔到男主角市川染五郎都大有來頭，佢係偶像明星松隆子哥哥（但個樣真係一ｄ都唔似），亦係日本最著名的歌舞伎世家市川家的掌門人，佢係戲中表現的傳統技藝，真係非一般演員可以做得到！

可能之前舞台劇上映時，亦是由市川擔任男主角，所以在電影初段，覺得男主角演譯得比較誇張，但後半段愈演愈出色，可以話只係睇佢一人表現。而阿修羅－擁有傾倒眾生美貌的女人，本來由宮澤里惠演都十分不錯，但自從佢厭食症之後，真的瘦得可憐，美貌大打折扣。

其實個人感覺呢套戲和《無極》有ｄ相似，CG場面和武打方面都比《無極》差好多，但勝在故事簡單緊湊，背景音樂好聽（雖然用英文歌奇怪左ｄ），實在比《無極》好睇好多！

宮澤里惠和市川染五郎

The Wedding Date

2006-08-02T02:37:00.000+08:00

講婚禮的電影好多，有茱利亞羅拔絲的《真的想嫁你》、曉格蘭特的《四個婚禮一個葬禮》、蘿霸珍妮花露柏絲的《戀上你新郎》等等，套套都sell靚人靚景。

今次睇呢套電影《戀愛嫁期 The Wedding Date》，雖然係香港上映過，但好似冇乜人識，成套戲最出名的要算是男主角Dermot Mulroney，記得《真的想嫁你》裡面的新郎哥嗎？差不多十年後再見明顯成熟左好多，好似冇以前咁靚仔！套戲故仔相當老套，女主角Kat因為要參加細妹的婚禮，而當伴郎的是昔日拋棄她的未婚夫，為左要證明自己活得比你好，於是用高薪聘請男妓Nick陪佢出席呢個婚禮。

整套戲好平淡，冇高低位，亦冇令人感動的情節，劇情發展唔係好流暢，Nick愛上Kat的說服力亦不足，最慘係好似各個演員都演得不夠投入，完全冇角色可以令人留下印象，唯一可取的都有靚景睇，去影視店租黎睇都無妨。

飾演男女主角的 Dermot Mulroney 和 Debra Messing

灣仔書展

2006-07-22T00:08:00.000+08:00

一年一度暑假的大型書展又到，照例三大兩小魔怪一齊去，星期五中午一點入場，完全唔駛行大運或排隊(幾年未試過)，仲諗住今年會唔會人少ｄ，但真係除左兒童館，其他館都仍然逼爆人，好彩尚算可以逼住o黎睇，相信星期六日就好難講！

六點左右，送走兩大兩小魔怪，自己繼續作最後衝刺，今年的書普遍都有七至八折，比舊年好好多，簡體書區的種類及數目都多了，而且仲逼過繁體書區，似乎越o黎越多人唔介意睇簡體字。今次自己總共買了十一本書，用了約280大元，好扺！另外又幫人買了五本，算是大豐收，再多我都搬唔郁了！

兒童館最少人，其他館就逼爆了。

戰利品：三本小說、三本工具書、五本畫冊、四本漫畫、一本雜誌及一罐汽水(買漫畫送)。

尋找冰川

2006-07-18T02:58:00.000+08:00

由《荒野天使》到《異境奇緣》，一直都好鍾意冰川今日子的漫畫，佢畫功唔係好靚個種，但就係鍾意，純屬個人喜好。追冰川的漫畫，需要有好好的耐性，動不動就一年一本，好的話一年出兩本，算是少產的漫畫家，因為聞說佢只有一位幫忙貼網紙的助手，其餘都是自己一手一腳包辦。

《異境奇緣》完結了之後，一直等緊冰川出新的漫畫，前排上網無意中發現原來今年年頭已經出左，真係烏sir sir！新作港版叫《綾羅戀曲》，台版好似叫《如織似錦》，諗住即刻走去漫畫店買，點知去左幾間都話冇！搵到有的又只有台版，唉！為有等佢出第二集先一次過買吧，可能又要等一年了！

圖為荒野天使及異境奇緣。

美劇６ - Alias

2006-07-17T01:31:00.000+08:00

明珠台譯名係《特務A》，好明顯呢一套係講特務的劇集，飾演女特務Sydney的女演員Jennifer Garner外型硬朗，都有點點說服力。

故事初期都幾緊張，女主角Sydney被美國政府CIA的秘密組織SD-6聘用為特務，工作絕對機密及非常危險，唔可以俾第三者知道包括家人及好友，但好衰唔衰Sydney就講左俾佢未婚夫聽，於是SD-6就派人殺死左佢Honey，就在Sydney好傷心之際，佢發現原來SD-6並唔係屬於CIA，而係由一個恐怖組織控制，於是佢為左報仇，就幫助真正的CIA繼續潛服係SD-6做雙面間諜。

講到呢度都幾複雜，但睇落原來只係冰山一角，仲有原本同Sydney好疏離冇乜溝通的老豆原來都係SD-6裡面做雙面間諜！佢本來話死鬼左的媽媽又原來冇死到，仲係蘇聯的KGB間諜，之前嫁俾佢老豆又係間諜任務……

套劇第一季已經睇到個頭開始出煙，上網睇好似總共出左五季。某同事睇過Alias，於是八卦問問，往後情節將會出現間諜妹妹、複製人、拯救世界之類……總之比之前更加複雜，為免炸爆我個頭，都係放棄繼續了。

底線

2006-07-10T23:40:00.000+08:00

意大利終於贏了世界盃，昨晚的決賽大家都驚訝法國球王施丹，在球場上用頭將意大利球員撞倒地上，繼而被罰紅牌出場。施丹一向都出名冷靜，究竟對方同佢講左ｄ乜？呢場比賽之後，好多人都鬧施丹行為愚蠢，連累法國輸波，但我仍然欣賞及支持呢位法國球王。

全人類都知道呢場係施丹的告別賽，相信佢自己都好希望打一場精采的比賽，讓自己光榮引退，但呢次的行為，好明顯對方的言語已超過了他容忍的底線，忍無可忍，在球場上出手(頭)打了對方球員。每個人都有自己的底線，如果過了底線仍然容忍，連僅有的尊嚴都棄掉的話，人生就太可悲！好在國際足聯宣佈施丹獲得今屆世界盃的金球獎，算是另一種支持及安慰。

引述亞洲時報：據轉播比賽的法國電視台解說員在賽後公佈的說法是，意大利球員馬特拉齊當時辱罵施丹為「意大利養出來的一條忘恩負義的狗」，如果屬實，施丹顯然無法忍受如此奇恥大辱，儘管當事人迄今並沒有公開證實這說法。施丹曾長期在意大利效力，其後在九八年世盃中取得佳績，並加盟皇馬。

魔間叛徒

2006-07-09T00:23:00.000+08:00

《Underworld Evolution 妖夜尋狼之魔間叛徒》係繼續第一集未講完的故仔，上集好多未解釋的迷，女主角一家點解會俾人滅門？點解長老要收養女主角在身邊做左右手？結尾時係地底快要復活的殭屍有幾勁？仲有原來不斷出現的項鍊係好關鍵的物件……

其實上一集的故事已經非常複雜，人物關係千絲萬縷，殭屍與人狼之間雖然敵對又關係密切，睇漏一段對白都分分鐘唔明講乜，今集似乎係要繼續解釋佢地的關係，人狼與殭屍的打鬥更加暴力血腥，絕對不適宜與兒童一齊觀看。飾演女主角的姬蒂碧金施蓮(Kate Beckinsale)仍然係主導人物，男主角只不過是旁邊的大配角，甚至反派的角色都比佢突出。

Kate不是演技派，但佢有一種吸引人的獨特氣質，故不少大片例如《狙魔人》和《珍珠港》都會搵佢做女主角，希望佢好好磨練演技，唔好白白咁浪費左大好前途！

點止書櫃咁簡單

2006-07-06T02:32:00.000+08:00

發現完個日文書櫃之後，又發現到一個近似的網站《豆瓣 douban》，呢個雖然冇個書架俾你放書，但係可以記錄你睇過、睇緊或者想睇的電影、書籍及音樂，仲有你對佢地的評價及感想，亦可以係裡面搵到ｄ志同道合的朋友，睇睇佢地對同一樣東西的感覺，都幾有趣。

最重要的是呢個係中文網站，雖然用的是簡体字，但上載或顯示繁體字都無亂碼的問題，非常好用！註冊亦非常簡單，只要登記後在email裡確認就可以了。

個日文書櫃可以收埋佢了，呵呵！

球迷哭了

2006-07-02T12:41:00.000+08:00

阿根廷走了！

英格蘭出局了！

巴西你令人失望了！

雖然今屆我估德國冠軍，
但點都諗唔到咁多強隊提早拜拜，

相信至少有八成球迷已經崩潰，

之後無線直播都起碼一半人選擇去搵周公。

She's the Man

2006-06-30T14:33:00.000+08:00

放假無無聊聊走o左入戲院睇《球愛可人兒 She's the Man》，食住世界盃個勢，冇乜大片夠膽係呢個時間上映，於是呢ｄ低成本，無明星的青春片就o黎料喇。

出乎意料之外呢套片又幾好笑，差不多由頭笑到落尾冇乜冷場，估唔到一班後生仔個個演得生鬼有趣，故事雖然非常老土，但勝在沒有婆婆媽媽。

女主角雖然不算美女，但反串男孩子的樣子和動作惹笑抵死，坐在我後面的一班大男人笑得仲大聲過我，相信佢地都好有共鳴。校草男主角又真係幾靚仔，仲時時赤膊上陣，正呀！久不久睇o下呢ｄ開開心心唔駛用腦的戲都唔錯呀！

不是Mr Bean

2006-06-28T03:59:00.000+08:00

如果你諗住睇Mr Bean個類型的笑片，睇完《戇豆撞正女殺手 Keeping Mum》，你應該會和我一樣失望。

如果當係睇笑片，其實好鬼悶，笑位不多，故事無乜驚喜。Mr Bean今次好正經咁做戲，角色仲要好似係大配角一樣，雖然有ｄ內心戲，但我覺得佢演得麻麻地，都係做番Mr Bean好ｄ！

可能個中文譯名真係好有問題，令人一睇就覺得又係由頭笑到尾的喜劇，不過如果你無期望係Mr Bean的戲，套戲又唔係咁差，仲好似有ｄ野講到出o黎，整套戲最正就係由瑪姬史密夫(Maggie Smith)飾演的女管家，表面上和譪可親，但內裡其實精神失常，Maggie做得無野好講，薑真係老o既辣！

下次大家有機會睇之前，記得唔好當呢套係喜戲，唔好諗住睇Mr Bean，到時套戲可能會有番ｄ驚喜俾你！

進入16強

2006-06-25T12:02:00.000+08:00

呢個月不停世界盃，個個返工無晒精神，之後仲有兩個星期，場場都係生死戰，問你死未！頭先經過商場裡面，在開場前兩個鐘，已經有一大堆人在等開波，平時拍烏蠅的Cafe全部滿座(可以睇到大電視)，但係仲有兩個鐘喎？！你杯咖啡幾隻雞翼點可以咬四粒鐘呀！！

蕃茄又搬家了

2006-06-24T22:40:00.000+08:00

夏日炎炎，白天完全唔想出去同太陽伯伯見面，今晚終於捨得去10蚊店買左一套花盆幫小蕃茄搬家，不知不覺已經種左兩個月，本來五株幼苗，兩株宣布死亡，一株有好心人領養，餘下兩株奇蹟地生存下來，要知道將生命交係老人癡呆的人手上，真係要有奇蹟先得，哈哈！

快打柴

2006-06-18T12:55:00.000+08:00

近來我個mon成日都開唔到，今次一開仲死係呢個畫面，之後reboot又回復正常靚仔畫面，真係吹漲！究竟係邊度出現問題？真係個mon？定係張display card？又或者係條mon線？千祈唔好係底板！！有冇高人知道發生乜事？指點o下我啦！

滯銷吉祥物

2006-06-17T15:57:00.000+08:00

今年世界盃的吉祥物是一隻獅子(GOLEO VI)和一個足球精靈(Pille)，唔知點解今年德國會選獅子做佢地的吉祥物？德國的象徵是老鷹，獅子是反而是英國的象徵，所以呢隻獅子和1996年英國世界盃的吉祥物非常相似，少了一份代表性。

仲有呢隻獅子奇怪在著衫唔著褲，雖然可以說獅子本身都唔會著衫，冇著褲又有乜奇怪，但係……唔識講，你自己睇吧！電視台到當地訪問，大部份德國人都覺得呢隻冇著褲的獅子很丟臉，令人沒有購買意欲，生產商更因為呢隻吉祥物滯銷，而要面臨破產！

MV：All Together Now

2006-06-17T14:40:00.000+08:00

呢隻冇著褲的獅子雖然唔受當地人歡迎，但佢呢首Music Video《All Together Now》的CG又做得真係非常之正，未睇過就要睇o下呀！

MV：東方的鬥魂

2006-06-13T13:09:00.000+08:00

日本隊輸了，今晚到南韓對多哥，希望南韓隊加油啦，韓國著名組合東方神起都唱左首歌幫自己的國家隊打氣，聽完我都係覺得李克勤當年個首《球迷奇遇記》好聽ｄ！「起來起來起來起來今晚大家不想去街起來起來起來起來坐低又起身博命嗌…」

世界盃效應

2006-06-11T00:00:00.000+08:00

世界盃專利播映權近呢幾屆都俾有線電視奪取，要舒舒服服坐係屋企睇的話，就要乖乖俾錢交月費，但無理由為一個月的世界盃而申請有線電視！於是大家想盡辦法，去酒巴睇、去朋友屋企睇、去宵夜食店睇，仲有上網睇大陸電視台等等，要知上網睇有好多風險，隨時隨地LAG或者睇睇o下斷線，開波前仲要一早開定唔係入唔到線…

今年好多商場都直播埋一份，到時到候電視機前面就迫滿人，商場裡面熱熱鬧鬧，其他店舖就拍晒烏蠅，難得機會，第一時間走入超市，唔駛排隊俾錢，爽！

MV：Dear Woman

2006-06-10T22:46:00.000+08:00

哈哈！唔好介意我又Post呢首歌，因為我真係覺得呢首係Smap近年最好聽的一首了，今次仲睇埋佢地親身演譯的Music Video，點解佢地十幾年都好似冇乜老呢？

書櫃教學

2006-06-09T02:58:00.000+08:00

終於有人對我的新書櫃有興趣，為免又俾人問十幾次，於是都係呢度一次過講解，哈哈！其實呢個書櫃係日文的，所以裡面可以放的書都要是日語版本，如果你大部份都係放日本漫畫就Very Good啦！除左書仲可以放CD,VCD同精品，其他自己發掘啦，最先當然要去Booklog個網， http://booklog.jp/

另外，Booklog個網本身好似冇方便Blog用的小icon，所以要自己做後放在Blog上，唔介意可以隨便用我的都可以呀^o^

V：666大件事

2006-06-07T13:16:00.000+08:00

666係外國人o黎講係魔鬼的標記，中國人就話66無窮，所以搞左好耐的長江三峽工程，就係尋日06年6月6日進行擋水圍堰爆破工程，由於呢次爆破規模與難度都是非常少見，更被稱為是「天下第一爆」！大家一齊回味o下呢一爆啦！

世界盃快到了

2006-06-02T13:10:00.000+08:00

今屆日本有份踢世界盃，相信當地會俾香港更有氣氛，連Tag Friends都有足球場俾大家踢o下波，仲有唔夠十日就開波，同為黃種人，都會為南韓日本打o下氣！

記得留意比賽日子，唔係錯過左打氣時間！世界盃時間表
(左)巴西俾球證紅牌？(右)我都換左件球衣，但唔知係邊個國家呢？

X-men vs 達文西

2006-06-02T01:13:00.000+08:00

睇左近期兩套大片，兩套都係我喜歡的片種，先講《達文西密碼》，未睇過小說，但我係雲海的聽眾，多少都對呢ｄ聖杯呀…隱修會呀…都有少少concept，故事都幾吸引，但好明顯佢好多情節都趕收工，咁複雜的故事要係兩小時講晒，真係有ｄ牽強，估計好多人會睇到一頭霧水，如果套戲可以四小時，相信可觀性好好多！

另一套《X-men 3》同《達文西密碼》剛好相反，故事非常簡單，只係繼續第二集的情節。一直覺得女主角(??)Jean Grey唔靚女，睇完呢集相信已經改觀了。仲有聽聞飾演暴風女Storm角色的荷爾芭莉Halle Berry用罷拍來爭取更多的戲份，今集無疑佢同金剛狼Wolverine出場最多，但暴風女仍然被其他角色搶晒鏡。第三集出現了好多新的變種人，幻影貓Kitty Pryde算是難得一位討好又可愛的變種人，難怪冰人Iceman都被佢吸引！

從呢兩套電影o黎講，《X-men 3》比《達文西密碼》更富娛樂性，難怪美國票房好似X-men比較收得。

Jean Grey 與 Kitty Pryde

納命來！

2006-05-22T00:43:00.000+08:00

自問不算膽小，甚麼老鼠、四腳蛇、甚至去泰國大蟒蛇纏身影相都未驚過，但由細到大對"蟑螂"的恐懼有增無減，所以都盡量令到家裡無佢地生存的空間，但剛剛在我看完明珠台Tom Cruise個套MI2的時候，就見到一隻長約兩吋的蟑螂由飯廳的窗爬入黎，家裡的兩位御用殺手又熟睡中，為免隻野留o係我屋企開技散葉，於是去廁所搵支Bio Kill去噴佢（離目標一米）。

一噴佢就走左去鞋櫃後面，我又唔敢追殺得佢太緊要，怕佢突然正面攻擊，於是o係鞋櫃四周不停噴，再o係去房間的走廊前面噴，又o係我房門前再噴，成條走廊基本上已經俾我噴到濕晒，相信佢都唔敢走近呢度，心諗佢high左Bio Kill聽日應該會見到佢條屍，於是好放心咁走去洗白白。

就o係我洗完白白一開門，就見到走廊有個黑影爬緊過黎（咁似貞子＠＠"），隻翼拍下拍下好似想報仇飛撲過黎，仲同我講：納命來！我再忍唔住尖叫，就在殺手一號搵眼鏡的時候，隻野仲要爬入廁所，我已經嚇到跳左入浴缸，好在殺手好快出黎搞掂左佢。

*以上情節非常真實，絕無誇大成份！

新婚快樂

2006-05-21T01:10:00.000+08:00

同事drew大婚之喜，要走到荃灣飲佢個餐，由將軍澳十幾廿個地鐵站，一頭一尾個幾鐘先到，真係俾晒面^0^，上到去等開餐，又話八時入席，點知九點半先開始有得食，好彩一早同班同事去左樓下商場打左底，唔係消化埋個胃。

頭先係酒樓冇機會講，呢度補番先，祝drew同calcy百年好合，永結同心，早生貴子！

每人都有一份結婚的小禮品，都幾精緻呀！

蛋撻雪糕

2006-05-20T02:26:00.000+08:00

o係7-11見到呢盒好新奇的雪糕，忍唔住買黎試o下，一盒有六個，無獨立包裝，一個大約有半杯雪糕的份量，個撻皮同雪糕筒味道差不多，冇乜特別驚喜，亦食唔出有蛋撻味，樣子亦唔太似，相信唔會再買黎食！

智慧手作仔

2006-05-18T01:21:00.000+08:00

今日有同事買了一少片晶石，正煩惱點樣先可以將佢放置得靚一ｄ，想到用萬字夾但又放唔穩，於是求助本組的魔術手，好神奇地佢用一個"噹噹"就搞掂左，仲可以調校角度，佩服佩服！

三號風球

2006-05-17T13:40:00.000+08:00

仲估今次會掛八號，出面ｄ風"呼"左一晚，冇覺好o訓，三號風球點解好似仲大風過八號？近來掛住打機，睇住個角色係度釣魚都幾得意呀！

一分為五

2006-05-07T00:16:00.000+08:00

被我遺忘了好多日的蕃茄，今日終於有時間同佢地分家，最粗壯的留在原罐裡，其餘的用紙杯種住先，希望佢地冇俾我整死啦，如果真係長得大，唔知有冇人肯收養呢？

有堆火

2006-05-06T00:19:00.000+08:00

可能仲係新手村的關係，好難得見到有咁多人，仲有堆火(好似有回復用途)，一班人圍住等火熄。

深圳金光華廣場

2006-05-05T22:56:00.000+08:00

今日又出發去深圳食食食，本來諗住假期過關會多人，點知少人得出奇，可能個個去左長洲搶包山。

首先到與地鐵國貿站相連的金光華廣場，七樓有一間名氣幾大的食肆《廚房制造》，裝修到好鬼High，有齊中日泰菜選擇，今朝個個都唔太肚餓，於是選擇叫點心食，水準有ｄ失望，份量又少(個碟就好大)，連招牌點心《天下第一包》都話賣晒，相信下次唔會再去！商場裡其他食肆還有咸亨酒店(浙江菜)、鼎泰豐小籠包、元祿壽司、味千拉面、海皇粥店…

金光華廣場外貌

晚飯終於去到芛崗東路百匯大廈的《西湖春天》食了！東坡肉太正了、蔥油蛤蜊好鮮甜、寧式鱔絲好入味、醬板鴨好似唔鹹的臘鴨但幾好味、杭椒皮蛋樂園路o個間好味ｄ、龍井蝦仁不過不失、糯米紅棗好食到唔停得口……九碟共人仔300大元，比樂園路貴一點，但這裡食得舒服又安心，水準亦高，下次一定再到！

瑪奇Mabinogi

2006-05-04T01:34:00.000+08:00

一直好想玩呢隻online game，但考慮要交月費的關係放棄了，前幾日再看台灣版及大陸版都有每日兩小時免費上線，終於下載台灣版來試一試(個人一直喜歡認識台灣人多D)，限時都有好處，唔駛日日熊貓眼返工！

咕在幫羊咩咩剪羊毛^0^

1.首先要下載主程式；

2.如果你不是GASH的會員，先到會員中心登記，記住要填真實的Email用來確認；

3.成功登記成GASH會員後登入到會員中心，到"開啟遊戲/服務帳號"，點選"瑪奇Mabinogi"，開通後就可以進入遊戲！

**想和咕一齊玩的進入迪恩伺服器呀！

分類：無聊閒事

2006-05-01T03:11:00.000+08:00

分類：音樂欣賞

2006-05-01T03:10:00.001+08:00

分類：得意遊戲

2006-05-01T03:10:00.000+08:00

分類：電影電視

2006-05-01T03:09:00.001+08:00

美劇５ - Desperate housewives

美劇４ - Buffy the vampire slayer

美劇３ - Medium

美劇２ - Supernatural

美劇１ - Sex and the city

分類：動漫周邊

2006-05-01T03:09:00.000+08:00

分類：飲食旅遊

2006-05-01T02:49:00.000+08:00

可樂世界盃廣告

2006-05-01T02:27:00.000+08:00

近期係電視成日會睇到可口可樂的世界盃廣告，泥膠公仔故事抵死有趣，原來仲有未在電視播出的短片，在官網上有得睇，其他幾段同樣有趣抵死。
按這裡去看看它們吧！

生日快樂

2006-04-30T20:16:00.000+08:00

今日慶祝老豆牛一，大嫂親手整左一個生日蛋糕送過黎，賣相都唔錯，拍得住出面餅店賣個ｄ呀！在此祝老豆生日快樂，身體健康，長命百歲！

SONG：Dear Woman

2006-04-29T02:03:00.000+08:00

上次講開資生堂個靚靚廣告，佢首主題曲由Smap唱的《Dear Woman》係日本好鬼Hit，一出就獲得首周單曲冠軍，十幾年都咁紅的組合，真係好少有！

快高長大

2006-04-29T01:25:00.000+08:00

哇！哇！唔知係咪經過五日未淋過水，久旱逢甘露，尋日一淋水今朝就已經立刻多四條芽仔浦頭，好勁！

資生堂廣告

2006-04-28T03:22:00.000+08:00

資生堂為美髮用品TSUBAKI，請到六位女星觀月亞里莎、仲間由紀惠、上原多香子、田中麗奈、廣末涼子、竹內結子等演出，還有Smap唱廣告主題曲《Dear Woman》，真係財雄勢大！

美劇５ - Desperate housewives

2006-04-27T23:11:00.000+08:00

初初未睇呢套劇以為係好似《Friends》個類型的開心處境劇，點知原來係懸疑黑色喜劇，全劇就係由一個師奶自殺開始，漸漸發現呢一家原來有一段不可告人的秘密。

《Desperate housewives》的編劇唔知係咪男人，如果係的話，佢心目中的女人都幾可怕，劇裡面的五位女主角個個都表裡不一，暗藏機心。可能現實有太多呢ｄ人，當睇到某ｄ情節，大家都會心微笑，所以連美國第一夫人羅拉(布殊老婆)都係佢Fans之一。

美國已經播到第二輯，靚太們的老公，死的死，失蹤的失蹤，靚太要自已面對難關，所以我覺得個中文名，明珠台都譯都幾好，真係《靚太唔易做》。

左起Edie, Susan, Lynette, Bree, Gabrielle

鯉魚隱形人

2006-04-27T15:12:00.000+08:00

係咪鯉魚節？幾月幾日？點解要慶祝？仲有原來隱形人會咪咪眼笑…

節錄網上解釋：5月5日男孩節/端午節。在這一天，有兒子的家庭門前均懸掛著祝男孩子健康成長的鯉魚旗。這天家家戶戶門上還擺菖蒲葉，屋內掛鍾馗驅鬼圖，吃驅邪的糕團或粽子。鯉魚旗表示鯉魚跳龍門，是用布或綢做成的空心鯉魚，分為黑、紅和青藍三種顏色，黑代表父親、紅代表母親、青藍代表男孩，青藍旗的數量代表家裡男孩人數。日本人認為鯉魚是力量和勇氣的象徵，表達了父母期望子孫成為勇敢堅強的武士的願望。

發芽了！

2006-04-27T14:43:00.000+08:00

今日老豆突然同我講發芽了，我仲一頭霧水？！乜野發芽？老人癡呆的我，星期六種了觀賞蕃茄，之後完全將佢遺忘左，一直冇再淋水(老豆都冇幫我淋)，點知佢冇死到仲可以出芽，生命力真係頑強^0^

美劇４ - Buffy the vampire slayer

2006-04-24T01:17:00.000+08:00

呢套係美國好受歡迎電視劇由1997年播映第一季，至2005年終於播完第七季結局，唔知點解一直無機會係香港播映，反而衍生一套《我和殭屍有個約會》，Buffy首季係一套好老套的殭屍片，女主角做驅魔人，打交手硬腳硬，仲隨身用一支木樁就可以搞掂一班殭屍，真係有ｄ兒戲。但無奈殭屍片真係我的至愛，愈睇愈想繼續追黎睇、在網上找討論區睇之後的劇情發展……好彩第二季開始特技和情節都開始愈入佳境^0^

《Buffy the vampire slayer》故事講每個年代都有一個被選為驅魔人，佢擁有消滅殭屍和惡魔的能力，而且必須獨自面對一切，而16歲的女主角Buffy就是選中的人，自此佢由一個受人喜愛的陽光少女，變成離群的問題學生，而一直暗中幫助佢的男主角Angel卻是一隻殭屍(哇，好老套！)。

到第四季男主角無奈要離開，電視台竟然另外開一套新劇《Angel》，繼續講男主角離開後到LA的冒險經歷，兩套電視劇同時期播出，角色互相crossover往來，呢種意念都幾得意新鮮，唔知香港幾時有人學呢？

Angel送Buffy定情的戒指

美劇３ - Medium

2006-04-22T22:07:00.000+08:00

如果你好似《鬼眼》裡的小朋友，可以看見鬼魂甚至可以溝通說話，你會好驚？逃避？好開心可以問下期六合彩號碼？《Medium》係真人真事改篇，主人翁Allison現在仍是一位靈媒。此劇就講述佢自少可以看見鬼魂，在大學時代，夢見一個又一個的兇案情境，身為火箭專家的丈夫初以為太太精神失常，後來又發現離奇地與事實相似，於是Allison就用自己的能力，協助警方找出真兇。

此劇冇靚仔靚女座鎮，明sell懸疑的電視劇，第一輯最後一集講到Allison的好友探長Push為找真兇，決定走去自殺（以為變左鬼乜都知），死鬼左就可以講俾Allison聽，究竟佢死唔死得去？明珠台第時先肯播第二輯？雖然我已經知道結果，但係都等你自己去睇啦！

Allison與丈夫Joe

美劇２ - Supernatural

2006-04-22T12:55:00.000+08:00

《Supernatural》是靈異電視劇，未有香港電視台播映，內容講本來一個幸福家庭，一日母親被凶靈釘在天花板上燒死，父子三人為尋真相踏上驅魔之路；本來無意驅魔，夢想讀醫的幼子，女友同樣亦被凶靈燒死，而在此時父親亦突然失蹤，兩兄弟在尋父的路上，四出尋找線索和滅魔。

暫時睇到十集，細佬似乎有預知的靈力，會唔會母親和女友的死都同佢有關？佢老豆又似乎隱瞞住一ｄ事……美國好似做到廿一集，唔知會唔會有第二個season呢？

大佬Dean(左)和細佬Sam

終於Bingo了

2006-04-22T02:35:00.000+08:00

哇！哇！終於Bingo了，玩到第三個星期，第六天連中三個數字終於Bingo，只有20P獎賞，而家計埋總數都係二百幾，幾時先可以儲到1000p？俾次第一日就Bingo呀，唔該！

美劇１ - Sex and the city

2006-04-22T01:19:00.000+08:00

**注意：唔想知結局別看

剛剛睇完第六輯大結局，四位單身貴族由第一輯皇帝女唔憂嫁，四出玩樂溝仔，到最後各人意識到快四張，要求真愛就要犧牲付出，那怕人老珠黃就太遲，《Sex and the city》結局算是Happy Ending，四位幾經辛苦後都各有著落。

Miranda生左仔之後，發覺都係最愛Steve，結婚後一家樂也融融；Carrie與畫家一段情終結，發現原來Mr Big仍然愛佢；Charlotte不能懷孕，後終如願可以擁有自己的BB；Samantha雖然患左cancer，但明星男友不離不棄……明珠台好似播到第四輯，未睇結局的要慢慢等了，呵^0^

左起為Miranda, Carrie, Charlotte, Samantha

冇腳雀仔

2006-04-16T19:46:00.000+08:00

唔知幾時開始大潭水塘變o左狗仔樂園，一路上都有人拖住大大小小的狗散步或燒烤，今次去到2號燒烤場多左一對木造的大鳥門神，下次認住呢隻冇腳O既雀仔，轉入去就係正正燒烤地點了！

戰利品

2006-04-16T00:11:00.000+08:00

係萬象城Ole'（又稱深圳citysuper）買左馬小姐要的小肥羊湯包（右圖）之後，去埋科學館站的購書中心，可能係假期關係，多左好多人坐係地睇書，好在都買到三本想睇的。

係書店Hea到五點，本來諗住去西湖春天試菜，點知有人竟然睇書睇到傻左，遲左大半個鐘先到樓下集合，除左不斷被我地咒罵，仲食唔到呢間名店（六時後別妄想可以入到西湖春天），於是走左去樂園路華城漁港食海鮮，今餐當然有人請客！

深圳靚酒樓

2006-04-15T23:42:00.000+08:00

今日放假又走去深圳遊，同朋友諗住走去豪裝靚酒樓飲『High Tea』見識見識！在萬象城五樓的王子國宴，中午一點去到足足要等一個鐘，好彩萬象城大把o野行，唔肚餓都可以Shopping住等。

高貴的酒樓，豪華寬闊的座位，專人幫你添茶上點心，點心味道好，但嫌不夠熱（唔知係咪酒樓太大，送到都凍左ｄ），大家飲到唔願走……這裡價錢和旺角大酒樓差不多，在深圳算是貴價了！

V：迪士尼垃圾筒

2006-04-14T01:55:00.000+08:00

唔係個個入到香港迪士尼都有幸見過呢個垃圾筒，好幸運俾我撞到佢，佢同其他明日世界的垃圾筒一模一樣，但應該只得一個識同你講o野，仲會叫你寄信俾佢，如果你未見過佢，下次再去記得係明日世界搵下PUSH...^0^

復活隱形人

2006-04-12T02:32:00.000+08:00

仲有幾日復活節，唔駛問都知呢個係乜造型！Tag Friends應該每人派一籃復活蛋，餵飽大家就快餓死的寵物，定係快快餓死左我隻豬，幫我復活隻雞^0^。

洱海巨蜆

2006-04-12T01:34:00.000+08:00

講番雲南之旅的絮事，有日在大理碼頭預備坐船遊洱海，洱海係雲南第二大淡水湖（因為佢一望無際，大到似海所以叫洱海），旁邊賣海鮮的小販有一盤蜆，Size大得驚人（請看下圖蜆和腳的比例），好想問佢清蒸要幾耐？！仲有一串串半透明的海珠，樣子似圓形的椰果，高原湖水養的海產都唔同過人！

出爐鳳梨酥

2006-04-10T01:30:00.000+08:00

星期六有幸試到大嫂親手做的出爐鳳梨酥，估唔到鳳梨酥都可以自家製，一直以為應該係樣比較難整的台灣甜品。

根據大嫂所講，酥入面的餡料有現成可以買，只要動手做外皮就可以，製成品賣相和味道都不錯，外皮鬆化，入面的餡料還是軟軟的，正！有焗爐的朋友們可以試試呀。

好景吊車

2006-04-08T21:02:00.000+08:00

有日收工同煩煩主人講開去旅行的事，今次在大陸搭了幾程吊車，有些仲係雙腳吊在空中，只有一條橫欄在前面又沒有安全帶的吊車，高度比海洋公園的吊車高，小朋友及有畏高症的最好唔好搭啦。呢ｄ吊車只要你置生死於度外，沒有玻璃或鐵欄的阻隔，欣賞景色實在一流！

V：獨眼小狗

2006-04-08T02:03:00.000+08:00

就在經輪下的小路，有隻獨眼小狗迎接路過的人，佢見人就不停搖尾、吠和“請請”，非常可愛，相信係寺廟養的小狗，可惜當時手上沒有食物可以獎賞佢，但諗深一層，佢係咪都應該食齋呢？

V：全球最大經輪

2006-04-07T13:36:00.000+08:00

香格里拉獨克宗古城山上，有一座現時全球最大的經輪，我都有去轉左一圈^0^，山上風大，天氣又凍，經輪用金屬造，沒帶手套的我，隻手凍到赤赤痛！

SONG：青藏高原

2006-04-04T01:48:00.000+08:00

雲南小數民族喜歡唱歌跳舞，個個由朝唱到晚，常常聽到藏歌《青藏高原》．歌手韓紅更唱到紅遍全中國，藏族姑娘唱法和韓紅有些不同，反而另一位歌手李娜比較接近，但我在雲南聽的比這兩位歌手唱的還要好聽啊！

櫻花隱形人

2006-04-02T20:56:00.000+08:00

隱形人又有新搞作，頭頂生左棵櫻花樹，相信而家日本係欣賞櫻花的好時節，在雲南都見到有櫻花樹，但同日本的櫻花海就差好遠！

我回來了

2006-04-02T17:17:00.000+08:00

去了雲南八天，剛剛落機，今次好彩冇特別嚴重的高原反應，只係有兩晚睡不好，跑樓梯時心跳加速（在香港都唔好得幾多），好開心可以同藏族姑娘一齊跳舞，見到好似瑞士一樣的雪山，失望是香格里拉還有兩個月才見到廣闊的草原，下次有機會五月才去吧！

預備了一袋手信帶回公司，各位同事手快有手慢冇呀！

麥田圈

2006-03-25T12:26:00.000+08:00

一直都相信有外星人存在，宇宙咁大，無理由得地球存在有智慧的生物，好多奇怪的事都加強我對外星人存在的信念，麥田圈就係其中一個。

咁多年黎不停有新的麥田圈出現，好多人研究點解咁複雜同精密的圖案可以一夜間形成？究竟呢ｄ圖案有乜意思？如果唔係外星人做，咁會唔會係未來的人返黎同我地開玩笑呢？唔好再話俾我聽係天然形成，我打死都唔信！

Lucy Pringle's Homepage裡有好多麥田圈的圖片及事件內容。

2005年發現的麥田圈，圖案越來越複雜了。

好玩解迷遊戲

2006-03-25T04:13:00.000+08:00

Stanley博士的家係一個不太長的解迷遊戲，一陣間就可以玩完，玩落都頗有趣，最後結局仲出人意表。

貓漫畫

2006-03-24T02:36:00.000+08:00

愛貓的人多數都喜歡睇貓做主角的漫畫，《我為貓狂》裡的米高太像人，有點可怕，反而冇咁多人識的《貓貓日記》，貓與主人婆婆同樣都親切可愛，令人會心微笑，《貓貓日記》好似出到第12集啦，麻煩李小姐好去買黎借我睇..^o^。

聽聞四月會出第三集的《甜甜私房貓》都令一眾貓癡忍唔住要追住睇，加上全彩印刷又真係好鬼靚，近期仲出左好多精品，出扭蛋、出月曆，不停打劫Fans荷包！

紅景天茶

2006-03-21T01:12:00.000+08:00

下個星期就去雲南，今次會到高海拔的地方，上網周圍睇有冇預防高山症的方法，聽聞其中一種生長在西藏的中藥「紅景天」好似有效，前幾日行吉之島竟然發現有紅景天的茶包賣，盒面介紹功能抗疲勞、耐缺氧、抗輻射、抗衰老、補腎陽，仲話長期使用無副作用。

哇！三十幾蚊有咁多Function，梗係買黎試下啦！唔好話預防高山症，單係抗衰老呢樣都要買黎飲啦，但呢隻茶有一種好刺鼻的跌打藥味，好在飲落淡淡的，完全冇味道，閉氣一口飲晒都OK！

MV：願妳知我心

2006-03-16T13:02:00.000+08:00

願妳知我心－梁朝偉
（尋晚同事們唔知講開乜，馬小姐話只睇過石修版本的絕代雙驕，完全唔知梁朝偉都做過。其實梁朝偉仲唱埋主題曲，不過就唱得…）

原來我不帥

2006-03-16T02:10:00.000+08:00

自從有Internet之後，好多創作都可以係網上發表，好的作品更有機會走出網絡，例如早前的《他約我去迪士尼》、《我的野蠻女友》及《電車男》等，都分別可以出碟、出書及拍成電影。

《原來我不師》開始是在BLOG連載，其後受歡迎到又上雜誌又出書，本書睇落都幾好笑的，網上仍然連載著，有興趣去睇睇吧。

引述書藉介紹：『Lowes以幽默逗趣、輕鬆搞笑的對白、高潮迭起的劇情，描述一個名叫小莊的男生，從小一直自以為很帥，卻到大學時代才驚覺原來自己並不帥，還被心儀的校花頒發「好人卡」，承受果然不帥的悲慘打擊後，展開一段讓網友們笑到噴飯、甚至有人戲稱可能半途就會心臟病發送醫急救的奇妙故事……』

白色隱形人

2006-03-16T01:20:00.000+08:00

尋日發現隱形人又變左新造型，今日再睇已經回復原狀，白色透明頭頂有支棍仔，仲會不停有心型圖案飛出黎，唔知又係日本乜野節日的造型呢？相信都係同情人節有關吧！

傲慢與偏見(續)

2006-03-12T17:33:00.000+08:00

可能對電影《傲慢與偏見 Pride and Prejudice》有所期待，睇完之後真係幾失望！老實講，如果唔係好鍾意呢本小說，我會覺得呢套電影都幾悶。

舞會的戲，完全突出唔到女主角伊莉莎白一家的失禮，亦睇唔出男主角達西先生點樣漸漸受女主角吸引；大家姐珍不夠漂亮，沒有古典含蓄的美，兩姐妹亦沒有交流；片長只有兩小時，很多動人的情節都只有草草交待，令達西先生的魅力驟減，而男主角亦只有木口木面，一ｄ都feel唔到佢有幾傲慢；韋翰出場太少，說服唔到點解伊莉莎白會信佢片面之詞；仲有點解個個ｄ衫好似爛布一樣，雖然佢地唔係有錢，但話晒都係貴族，點解女主角著到好似女傭一樣？！很多影評雜誌都讚女主角Keira Knightley做得好，但我只係覺得佢表現普通，可能對手實在差勁。

總括o黎講，整套戲我只覺得傲慢不夠，偏見不足，BBC拍的電視劇版，真的比電影版好太多太多，無論演員、服裝、場景都比電影有心思，如果你兩套都未睇過的話，建議先睇電視劇吧，唔係你都會有偏見！

V：iPod Flea

2006-03-08T13:54:00.000+08:00

一段搞笑的iPod新產品影片！

醉轉彎心得

2006-03-07T02:42:00.000+08:00

上次試整蘇絲黃教的醉轉彎，味道都可以接受，大嫂及同事們都追問要買邊隻酒？要落幾多糖？放幾多隻雞翼？

睇佢節目裡面用古越龍山的紹興花雕酒，惠康有分別$3x，$4x，$7x的價錢選擇，我買左中價$4x，可能貴價整出黎會更好食卦！
以整左一次咁大把的經驗，十五隻雞中翼（應該可以放多ｄ），用兩杯半酒，三分一杯魚露，要落大約四湯匙的糖，記住係Tablespoon，唔係Teaspoon，個個都係呢度出問題，唔夠糖雞翼會有苦味呀，當然最緊要試到味道OK啦。記得整之前幾小時要雪冰粒同冰水，過冷河呢個步驟都好重要呀！

MV：還有愛

2006-03-04T22:03:00.000+08:00

還有愛－李秀英
（李嘉欣客串演出，首歌係韓文唔知講乜，睇段MV應該都係講三角戀卦！）

記憶探測機

2006-03-03T02:50:00.000+08:00

雖然《過目即忘》同《左耳入右耳出》都係我絕技之一，但深信仲未去到老人痴呆，但係玩完呢個遊戲，相信都要得閒搵番班豬朋狗友出O黎打O下麻雀，緞練一下先！

按這裡去玩玩記憶探測機，記得別錯過任何細節，相信無乜人可以全中，有的應該都唔係人，分數以第一次玩作準，別出術呀！

SONG：兄弟

2006-03-02T04:09:00.000+08:00

無線翡翠台今個星期六終於播《鋼之鍊金術師》大結局，裡面有一首俄文歌好好聽，印象中只係聽過同性戀女子組合t.A.T.u.的俄文歌，呢首好有聖詩Feel的歌，講兩兄弟手足之情，所以由兒童合唱團主唱，睇完套卡通再聽你會覺得仲正呀！（按左圖見歌詞）

Tag Friends

2006-03-01T02:18:00.000+08:00

呢兩晚好鬼忙，忙於周圍去睇人o地ｄ布置，仲要金精火眼睇實有冇送貨員o黎到，估唔到小小的一個方格，可以有咁多唔同的變化及用途，日本人o既心思真係厲害！唔知隻寵物要餵幾耐先可以咁大呢？（見圖最上中間個格）
寫Blog有興趣可以隨時加入啊，現在有簡体中文版，唔怕睇唔明呀！
http://tagfriends.com/